اكيد كل واحده مننا بيكون متضايقه جدا ان ميزانيتها مش مكفيه
و كنت دفعت جنيه على كل مرة قلت فيها مش هاجيب أوردرات أونلاين تاني، كان
زماني هيبقى معايا بتاع عشرة خمستاشر ألف جنيه كده .. الأونلاين شوبينج أو حتى نزول
السوبر ماركت عشان نجيب شوية جبن واطلع بفاتورة
ألفين جنيه في حد ذاتها خراب لميزانية البيت اللي كل ما أحاول المها، تفرقع من
كل حتة زي ترهلات البطن كده D: .. والحقيقة إني اكتشفت إن اللي بيضبط ميزانية
البيت وبيعدي عليه نص الشهر من غير ما يفلس، ده من الخوارق اللي “من عالم
تاني” علشان كده هنكلمك هنا عن خطوات بسيطة تعمليها لـ توفير مصروف البيت والميزانية. ورقة
وقلم واكتبي ورايا يا ست الكل بصوت الشيف شربيني.
أهم نصائح لـ توفير مصروف البيت والميزانية
قللي النزول
هو كده كده أساسًا احنا في وقت كورونا والمفروض نقلل النزول على قد ما نقدر
عشان التباعد الاجتماعي وكده، فاستغلي الفرصة دي عشان تعودي نفسك تقللي نزول السوبرماركت اللي بتتحول
بقدرة قادر لخروحة وتبدأي تسحبي كل اللي على الأرفف وانتي مغيبة زي الزومبيز.. حاولي تنزلي
مرة واحدة بس في الشهر عشان تجيبي مستلزمات البيت اللي ممكن تقعد شهر زي المنظفات
ومساحيق الغسيل والبقوليات.. ومرتين للجبن والأغذية والخضروات.
أفضل تطبيقات لمصروف البيت من هنا
الـUnfollow
نصائح لـ توفير مصروف البيت والميزانية
خلينا متفقين إننا بنحب نتفرج على جروبات بيع الأونلاين وحتى البلوجرز اللي بيعلنوا عن منتجات
ممكن تعجبنا فنلاقي نفسنا لا إراديًا بنطلبها.. ممكن يكون الموضوع ببساطة زهق أو الحاجة حلوة
بجد وتغريكي تشتريها حتى لو مش محتاجاها، بس الموضوع ده بيأثر بشكل كبير في مصروف
البيت أو حتى مصروفك الشخصي.. جربي تعملي unfollow للجروبات دي وهتحسي بفرق كبير في ميزانية
الشوبينج على الحاجات اللي مالهاش لازمة وفعلًا مش محتاجاها.
اهم نصايح لتدبير ميزانية رمضان
استغني عن الكريدت كارد
اشتري دلوقتي وسددي بعدين والساعة بخمسة جنيه والحساااابة بتحسب D: أهه الكارت الصغنن ده كفيل
إنه يخليكي تفلسي بسرعة لإنه الوقت اللي بيبقى معكيش فلوس فيه هيغريكي تشتري وتدفعي بعدين..
هو أينعم الكارت ده مهم وبيبقى فيه عروض وبينفع في وقت الطوارىء والأزمات، بس لو
استغنيتي عنه وانتي بتشتري أساسيات البيت هتبقي عارفة ميزانيتك اللي مش هتقدري تعديها، وبالتالي هيوفر
معاكي كتير في مشترياتك.
الدليفري لأ
الطبخ متعب وبيستهلك وقت وطاقة كبيرة، وبالأخص لو انتي بتشتغلي، فالحل السهل والسريع بيبقى الدليفري
اللي عايز ميزانية تانية لوحده.. لو انتي بتشتغلي ومعندكيش وقت تطبخي، جربي تخصصي يوم في
الأسبوع تعملي فيه أكلات جاهزة وتطلعيها من الفريزر.. ممكن كمان لو ميزانيتك تسمح تشتري أكلات
مجمدة هتكون أوفر بكتير من الدليفري.
أكتر من 20 نصيحة للتنظيف
العروض
ة
فيه محلات بيبقى معروف عنها إنها بتبيع بالجملة زي محل نجمة هليوبوليس في مساكن شيراتون،
لو انتي بتجيبي على سبيل المثال كميات من اللبن أو حفاضات الأطفال، إجمالي الفاتورة هيفرق
كتير لو بتجيبي من بقالة عادية أو سوبرماركت مش جملة.. دوري على أقرب سوبر ماركت
بيبيع جملة أو بيعمل عروض في منطقتك وخليه المكان اللي بتشتري منه احتياجاتك دايمًا.
لو عندك أفكار تانية للتوفير في ميزانية البيت شاركينا بيها في كومنت.
اسلوبي الجديد المتخذ للميزانية والتوفير اتفضلي واحكمي بنفسك
